Հայաստանում Լեռնային Ղարաբաղից բռնի տեղահանված անձանց հաշվառման ընթացքում իրականացվում է կարիքի նախնական գնահատում, հաշվառումն էական գործընթաց է՝ հետագա սոցիալական աջակցության ծրագրերը թիրախային դարձնելու տեսանկյունից:
«Արմենպրես»-ի փոխանցմամբ՝ այս մասին «Հումանիտար կենտրոն»-ում կայացած ասուլիսում ասաց Հայաստանի Ներքին գործերի նախարարության միգրացիայի և քաղաքացիության ծառայության պետ Արմեն Ղազարյանը:
Սեպտեմբերի 28-ի ժամը 19:00-ի դրությամբ հաշվառվել է 55 հազար 248 բռնի տեղահանված անձ: Հաշվառված անձանցից 26 հազար 575-ը արական սեռի են, 28 հազար 670-ը՝ իգական: Հաշվառվածների թվում կա 1172 հաշմանդամություն ունեցող և 133 հղի կին:
Հաշվառվածների շրջանում ամենամեծ թվով տեղահանվածները Ստեփանակերտից են՝ 27 հազար 408, այնուհետև Մարտակերտի շրջանից՝ 10 հազարից ավելի, Ասկերանի շրջանից՝ 7500-ից ավելի, Մարտունու շրջանից՝ շուրջ 7000 և այսպես շարունակ:
«Հաշվառումն իրականացվում է 2 փուլով, առաջինը՝ անձնական տվյալների հավաքագրումն ու նույնականացումն է: Սա շատ էական գործընթաց է՝ հետագայում բոլոր տիպի աջակցությունները, իրականացող ծրագրերը թիրախային դարձնելու համար: Առաջին իսկ օրվանից Կոռնիձորի հումանիտար կայանում իրականացվել է հաշվառվում: Սակայն հետագայում, երբ մարդկանց հոսքը մեծացել է, Կոռնիձորի կայանի նպատակայնությունը փոխվել է, և հաշվառման գործընթացն այնտեղ դադարեցվել է: Առաջին օրվանից հաշվառում իրականացվում է Գորիսում, չի դադարեցվել: Վայքում ևս բացվել է համապատասխան հումանիտար կայանը»,-ասաց Ղազարյանը:
Նա տեղեկացրեց նաև, որ սեպտեմբերի 27-ից արդեն irazekum.am կայքում ևս հրապարակված է բոլոր մարզերում հումանիտար կենտրոնների ցանկը: Եվ ԼՂ-ից տեղահանված բոլոր հայրենակիցները կարող են հաշվառվել այն հումանիտար կայաններում:
Ղազարյանն ընդգծեց, որ սոցիալական բոլոր հետագա ծրագրերը պետք է բխեն անձանց նույնականացումից և կարիքներից: Հաշվառման գործընթացում իրականացվում է կարիքի նախնական գնահատում:
